Det er hundrevis av småbåtar rundt Slinningsodden i Ålesund laurdag kveld. Der slikkar no flammane framleis høgt frå restane av Slinningsbålet.
Klokka 23.40 tippa bålet over og fall ned til bakken - medan det gjekk eit gisp og eit brøl gjennom folket som har samla seg.
Det brenn kraftig frå Slinningsodden. Både Kytstvakta og Redningsskøyta er til stades for å passe på så ingen kjem for nært flammane.
Det årlege spenningsmomentet er kor lenge det 35 meter høge bålet klarer å stå før det ramlar ned.
– Heilt nydeleg
Det har samla seg hundrevis av barn, unge og familiar på land for å sjå ut på holmen der det spesielle bålet brenn, tre dagar før den ordentlege sankthanskvelden.
– Jau, det er heilt nydeleg. Du er heilt ute i havgapet og har den utsikta, så ingenting er betre enn dette, seier Bjørn Pedersen frå Stryn. Han ser på bålet saman med familien.
Tyske Genoveva Vogl er på noregsferie og fann tilfeldig ut at Slinningsbålet skulle tennast i kveld.
– Vi er her for å sjå på, og det er så fint!
Har bygd bål i vekevis
Rundt 40 ungdommar har jobba sidan starten av mai for å få reist eitt av verdas største sankthansbål – med handmakt.
– Eg synest det er den finaste tradisjonen i Noreg. Det er kjempekjekt å vere her og mange fine folk.
Det seier bålbyggar Tarjei Haugen Stangeland. Han har vore med i mange år, og blei dratt med av broren sin første gongen som tiåring.
Tenner klokka 21
Årets slinningsbål blei målt til om lag 35 meter høgt i år og blei tent nøyaktig klokka 21.
Det var meldt vind, regn og skodde laurdag kveld, men det legg ingen dempar på gleda til bålgjengen. I det bålet blei tent var det opphaldsver og eit streif av sol, og regnet og skodda har så langt halde seg på avstand.
– Stemninga er på topp, som alltid. Det blir gøy å sjå bålet brenne ned etter all jobben vi har lagt i.
I år er det ti år sidan det tradisjonsrike bålet blei verdas største med ei høgde på 47,4 meter, som seinare blei slått.
Bålet er sett saman av pallar og store tønner, og dei blir lempa oppover frå mann til mann.
– Det er tungt arbeid. Du blir sliten viss du står i veggen eller trappa i fleire timar. Det er kjekt å kjenne at du jobbar. Det skal byggast for hand, seier bålbyggar-kollega Magnus Silset.
Det er strenge restriksjonar rundt bålet for å unngå ulykker etter at det er tent. Brannvesenet i byen er aldri langt unna.
Også Redningsskøyta og Kystvakta er på plass.
Klarer dei å berge tradisjonen?
Det første bålet på Slinningsodden blei tent i 1964. Før var det fleire konkurrerande bål i byen, men no er det berre Slinningsbålet igjen.
Bålgruppa er inne i eit generasjonsskifte, og har dei siste åra slite med å få like mange frivillige som før.
Kritiske røyster likar ikkje røyken som stig frå det svære bålet - eller tanken på all brenselet som går til spille.
Men det er stadig mange som samlar seg for å sjå bålet brenne. Dronning Sonja har besøkt Slinningsbålet i Ålesund fleire gonger, og mange turistar har måpande fått med seg den spesielle tradisjonen.
Både koreanske og tyske filmteam har sikra seg bilde av det særmerkte fyrtårnet av eit bål.
Langs resten av norskekysten blir det etter planen tent tusenvis av små bål tysdag, 23. juni. Det er den ordentlege sankthanskvelden.
Feira årets slinningsbål: – Ekstra stas