Framleis veit ingen kva som skjedde då småbåten med fire menn gjekk ut frå land i Averøy sist fredag.
Båten kom aldri tilbake til hamn, men blei funnen i sjøen med kjølen i vêret natt til laurdag.
Ein av mennene blei funnen omkomen. Dei tre andre er framleis sakna, men politiet trur at også desse har omkome.
Onsdag set politiet inn dronar i søket.
– Det er eit svært krevande søksområde, seier innsatsleiar Andreas Moseng Jakobsen til NRK.
Smøla kommune består av 5000 holmar og skjær.
Søkjer på vestkysten av Smøla
Politiet har førebels konsentrert søket langs vestkysten av Smøla, omlag tre mil unna staden der dei fann båten og ein mann natt til laurdag.
Dette er gjort etter at Hovudredningssentralen har gjort utrekningar på kvar dei sakna kan ha drive.
Jakobsen seier det er uklart om dei fire turistane hadde flyteplagg eller redningsvestar. Han seier dei ikkje brukte utstyr som dei hadde fått frå utleigar, men hatt sitt eige.
– Eg kan ikkje seie noko om kva dei har på seg, før vi eventuelt gjer funn, seier han.
Politiet har starta dei tekniske undersøkingane av båten onsdag.
Vil arbeide til det er mørkt
Politiet opplyser at dei har tre dronar i aktivitet, og at dei søkjer over område som er svært store. Søket varer heilt til det blir mørkt.
– Vi kjem til å jobbe så lenge det er dagslys og prøve å rekke over så mykje som vi kan, seier innsatsleiaren.
Tysdag blei ein av dei tilsette i utleigeselskapet avhøyrt.
Politistasjonssjef Ole Solenes seier målet med avhøyret var å få hjelp til å konsentrere søket.
Svarer ikkje om opplæring og utstyr
NRK har i fleire dagar forsøkt å få selskapet som leigde ut båtane i tale, etter at båten med fire personar om bord sokk.
Det utanlandske selskapet som driv utleige av båtar i Averøy, har ikkje svart på kva opplæring som blei gitt og kva tryggleiksutstyr turistane fekk før dei la ut på havet.
I ei tekstmelding tysdag ettermiddag skreiv ein av dei tilsette at dei ikkje kan svare på noko no.
Vil ha strengare regelverk
Etter forliset har debatten om strengare krav for båtutleige igjen blussa opp.
Statens havarikommisjon har tidlegare hatt fleire forslag til endringar i regelverket.
Dei meiner blant anna at det bør vere sporingsutstyr i båten, slik at ein kan reagere raskt dersom noko skjer.
Berre i år har sju utanlandske fisketuristar mista livet.