3.09,62.
Det var tida Karsten Warholm (30), Andreas Kulseng (25), Amalie Iuel (32) og Henriette Jæger (23) sprang inn til EM-gull på 4x400 meter i Birmingham.
Det hadde ikkje arrangøren fått med seg, og dei norske gullvinnarane «nekta å ta imot gullmedaljane».
– Vi nekta å ta imot
Det var eit norsk lag i ekstase som møtte pressa etter å ha sprunge inn til gull på opningsdagen av EM i friidrett.
– Vi hadde trena på mange scenario og alt slo inn. Vi var best førebudde der ute og vi får godt betalt, sa Karsten Warholm.
– Det var fantastisk å vere med på eit stafettlag og springe utan hekkar. Eg er veldig glad for at eg var med på det, fortsette han.
Dei norske vekslingane gjekk glitrande, og Henriette Jæger blei servert draumeposisjon på siste etappe før ho sjølv avgjorde og rykte frå på oppløpet.
Like glitrande var ikkje leveransen frå den britiske arrangøren, som skulle overrekke dei norske gullvinnarane beviset på at dei var nybakte europameistrar – nemleg gullmedaljane.
– Vi nekta å ta imot, fortalde Karsten Warholm.
– Ønsketenking frå deira side
Valøren var rett nok korrekt – det var gullmedaljar dei hadde fått utdelt.
– Dei hadde trykt feil tid, fortalde Warholm.
På medaljane var det inngravert feil tid. Den norske vinnartida (3.09,62) var bytt ut med den britiske sølvtida (3.10,47).
– Det var ønsketenking frå deira side. Dei hadde gravert tida før løpet, sa Warholm.
– Arrangørskandale?
– Ja. Det blir overskrifta, svarte han og lo.
Ankerkvinne Jæger fekk ikkje med seg feilen med ein gong.
– Eg la ikkje merke til det, det var gutane som såg det. Men det er kult når ein tar gull at det blir rett tid, sa ho.
– Den tida har vi kjempa hardt for, så den skal vi ha, la Kulseng til, før Warholm følgde opp:
– Det er jo meisterskapsrekord!
Fekk det riktige gullet
Men historia fekk ein lykkeleg slutt. Rundt 19.40 tysdag kveld fekk sportssjef i Noregs Friidrettsforbund, Erlend Slokvik, hente dei nye medaljane.
– 3.09,62, meisterskapsrekord. No kan vi vere stolte, sa Slokvik då han mottok den første riktige gullmedaljen.
Ein av dei konkurranseansvarlege under EM, Ken Burkett, var den som fekk overlevere medaljane.
– Då vi fann ut at noko var gale fiksa vi det så raskt som mogleg. Det var veldig synd at det ikkje var riktig med ein gong. Vi gratulerer Noreg med gullet og eit godt løp, sa Burkett.
Men det kan ta litt tid før utøvarane får medaljen.
– Det blir nok ikkje før i morgon tenker eg. Dei har nok lagt seg når eg kjem tilbake, avslutta Slokvik.