Kassembo har budd ulovleg i Noreg i snart 20 år og har vore landets einaste kyrkjeasylant. For få veker sidan blei utsendinga av han stoppa.
– Eg er kjempeglad, og veldig rørt for at eg får komme tilbake til Sunnmøre, seier Suel Kassembo til NRK.
Den siste månaden har han opphalde seg i Oslo og meldt seg til politiet fleire gonger i veka. Han må no melde seg til politikontoret på Herøy ein gong i veka.
– Eg har hatt det fint, men likevel veldig tøft i Oslo. Eg har budd fint, men eg gler meg no til å komme heim til mine, seier han.
Han fekk beskjeden då han skulle melde seg på politikontoret på Tøyen i dag. No skal han heim og pakke, før han tek første fly tilbake til Sunnmøre.
– Det blir kjekt å bruke sommaren på Sunnmøre. Eg er veldig glad.
Må tilbake til Austlandet i august
Advokaten til Suel, Andre Møkkelgjerd, seier at Politiets utlendingseining sa for fire veker sidan at grunnen til at han måtte bu på Austlandet, var fordi politiet hadde behov for å undersøke saka nærmare.
– Suel har i denne perioden samarbeida med politiet og hatt fleire samtalar med politiet. Det er ikkje gitt ei konkret grunngjeving for kvifor han no kan bu på Sunnmøre i sommar, seier han.
Politiet har gitt han løyve til å vere på Sunnmøre fram til 9. august.
– Det er ikkje gitt noko konkret grunngjeving til kvifor han no kan bu på Sunnmøre i sommar, men det tyder på at det fram til 9. august er eit avgrensa behov for samtalar mellom han og politiet, opplyser advokaten.
Kassembo er varig utvist frå landet og har heile vegen hevda at han er frå Burundi. Norske styresmakter ville sende han tilbake dit, men landet har nekta å ta i mot han.
Det var i starten av juni at Suel Kassembo vart henta av politiet for å bli sendt ut av landet og til Burundi.
Cecilie Johansen, i Politiets utlendingseining, skriv i ein e-post at dei ikkje kan uttalte seg om enkeltsaker på grunn av teieplikt.
– På generelt grunnlag vil pålegg om bestemt opphaldsstad og meldeplikt vurderast fortløpande etter vilkåra i utlendingslova, og ut ifrå kva som er nødvendig for politiets arbeid og framdrifta i verifiseringsarbeidet.