Sidan 16. mai skal russ på bussar frå Østfold forfølgt og utøvd vald mot russ frå Oslo-området.
Fleire har hamna på sjukehus, og det skal ha vore brukt ulike slagvåpen.
Det er to pågåande straffesaker etter valdshendingar ved Tryvann og Hvervenbukta.
No tar politiet grep for å unngå fleire samanstøytar.
Bortvising
Oslo politidistrikt har sett i gang tiltak for å hindre fleire valdshendingar mellom russebussane.
– Dersom enkelte bussar kjem inn i Oslo, vil dei bli vist bort. seier politiadvokat Jørgen Brodal i Oslo politidistrikt til NRK.
Bortvisinga vil vare i 72 timar, ifølge Brodal.
– Vi følger dei vanlege trappetrinna når det kjem til bruk av tvangsmiddel. Lågaste trinn er bortvising, seier politiadvokaten.
Operasjonsleiar Fredrik Solbakken i Øst politidistrikt, opplyser søndag at to Østfold-bussar er bortvist frå Oslo og Follo. I tillegg er ein russebuss frå Follo bortvist frå Østfold.
Opphaldsforbod
Også politiet i Østfold er på saka. Dei opplyste laurdag at dei jobba med å ilegge tre russebussar opphaldsforbod i Oslo i 72 timar.
Bussjefen på ein av dei aktuelle bussane frå Østfold, stadfestar til NRK at dei har fått opphaldsforbod i Follo i 72 timar.
Bussjefane til dei aktuelle russebussane vil bli orientert så fort det lar seg gjere, ifølge Brodal.