Det var kollegaer som fatta mistanke og slo alarm om at det hadde utvikla seg varme kjensler mellom ei av dei tilsette og ein pasient.
Kvinna var tilsett på den psykiatriske avdelinga der drapsdømde mannen får behandling og medisinar.
Det kjem fram av varselet til Statens helsetilsyn.
Nyleg miste ho retten til å praktisere i yrket sitt for å ha blitt kjærast med ein pasient.
Politiet har også starta etterforsking av henne.
– Ho blei meldt for å ha hatt eit intimt forhold med ein pasient, seier politijurist Anders Skorpen-Trøen i Møre og Romsdal politidistrikt.
Det var Helsetilsynet som melde henne til politiet, for brot på helsepersonellova §4.
Dømd for drap på 16 år gamal jente
Hundrevis av frivillige leita i vekevis etter 16 år gamle Sigrid Giskegjerde Schjetne i Oslo, før ho blei funnen drepen hausten 2012.
Ein sunnmørsmann blei seinare dømd til psykisk helsevern, og har dei siste åra vore i behandling ved ei av avdelingane i Helse Møre og Romsdal.
Det var han den tilsette kvinna innleia eit forhold til.
Sigrid-drapsmann overføres til tvungent psykisk helsevern
- Her er alt om Sigrid-saka.
Vil flytte saman med kjærasten
Kjæresteforholdet var tema i Sunnmøre tingrett tidlegare denne veka, då drapsmannen for første gang bad om å bli sett fri.
No vil han flytte for seg sjølv, og forklarte i retten at han såg for seg ei framtid med den tidlegare tilsette.
I retten fekk han spørsmål om han ønskte å bu åleine.
– Ja, men med tid og stunder håpar eg å flytte saman med kjærasten min.
I retten kom det fram at dei andre behandlarane var urolege for korleis forholdet til ein tilsett på den psykiatriske avdelinga kunne påverke den drapsdømde mannen.
Det blei også stilt spørsmål ved om ikkje om helseføretaket burde vore meir opptatt av dette.
NRK har spurt leiinga i Helse Møre og Romsdal om dette, men det vil dei ikkje svare på.
Miste arbeidet etter kort tid
Det gjekk berre ti dagar frå kollegaene varsla om at ein av dei tilsette hadde eit forhold til ein pasient, til ho måtte gå frå jobben.
Leiinga i Helse Møre og Romsdal vil ikkje stille til intervju og vil heller ikkje svare skriftleg på kva for rutinar dei har sett inn for å unngå at slikt skjer på nytt.
– Helsepersonellova stiller krav om at helsepersonell opptrer fagleg forsvarleg og ivaretar ein profesjonell relasjon til pasientane. På generelt grunnlag kan eg seie at eit romantisk forhold mellom tilsett og pasient ikkje er i samsvar med dette, skriv HR-direktør Kjetil Lundberg i ein e-post.
Beklagar i brev til Helsetilsynet
I mars i år miste kvinna autorisasjonen, og kan dermed ikkje praktisere yrket sitt lenger.
Kvinna ønskjer ikkje å kommentere saka overfor NRK.
I eit brev til Helsetilsynet går det fram at ho beklagar det som har skjedd, men etterlyser betre oppfølging frå Helse Møre og Romsdal, der ho arbeidde.
Helseføretaket vil ikkje kommentere dette og viser til teieplikta.
– Svært alvorleg
Fylkeslege Karin Müller Mikaelsen vil ikkje kommentere den konkrete saka, men uttaler seg på generelt grunnlag.
– Generelt ser vi svært alvorleg på forholda du beskriv. Slike situasjonar blir følgt opp gjennom individuelle tilsynssaker mot aktuelt helsepersonell.
Statens helsetilsyn vil ikkje kommentere saka, men stadfestar at saka blei meld til politiet i april 2026.
I 2025 var det 19 tilsette som mista autorisasjonen for å ha privatisert relasjonen med pasient/brukar, eller på grunn av seksuell relasjon med/seksuelle overgrep av pasient/brukar.
Det viser tal frå Statens helsetilsyn.
Møtte fram i retten
Kjæresten til den drapsdømde mannen følgde saka frå tilhøyrarbenken då Sunnmøre tingrett behandla saka hans tidlegare denne veka.
Frå vitneboksen forklarte han at dei to framleis er eit par.
Han er ikkje glad for at ho måtte gå frå jobben i psykiatrien i Helse Møre og Romsdal.
– Ho mista jobben. Dessverre, sa han.