Zelenskyj: Har snakka med Rubio om Starlink

Ukrainas president Volodymyr Zelenskyj seier han har snakka med USAs utanriksminister Marco Rubio, melder Reuters. Dei skal blant anna ha snakka om rakettar mot ballistiske missil, tidleg varsling av russiske luftangrep og situasjonen rundt satellittenestene Starlink og Starshield. – Eg er takksam for at han er klar til å hjelpe og for hans tydelege posisjon, skriv Zelenskyj i ei melding på X tysdag. Zelenskyj skal vere i Oslo tysdag og onsdag, der han blant anna skal ha samtalar med fleire statsleiarar og dei amerikanske spesialutsendingane Steve Witkoff og Jared Kushner. Målet med samtalane er å komme fram til fredsforslag som kan bli presentert for Russland for å få slutt på krigen i Ukraina.