I tysdagens formannskap informerte ordførar Andreas Vollsund at kommunen har avtalt med fylkeskommunen at kommunen kan få overta grusbanen nedanfor Brynehallen.
I saka som kom i Jærbladet på torsdag, med tittelen «Har sikra seg gratis fotballbane», står det at banen nesten aldri er i bruk.
Atterhaldet skuldast at det er ei gruppe som ikkje driv med fotball, men med friidrett, og som bruker banen til kasteøvingar.
Under artikkelen på Jærbladets facebookside, inviterer styremedlem Marie Tjosevik ordføraren til dialog om planane.
«Dette er der delanlegget til Bryne Friidrett er, og der vi har treningane våre med kastområde og lengdegrop. Litt spesielt å lese i Jærbladet at det nå blir et fotballområde», skriv ho i ei melding der Vollsund er tagga.
Styreleiar i friidretten, Per Rasmus Oftedal, fortel at nestleiaren deira skal møta ordføraren allereie på fredag.
– Når ordføraren vil vera handlekraftig, og skapa meir aktivitet for fotballen og idretten, er det jo det prisverdig. Men han må sjekka ut om det er andre interesser i området, og det er det jo her.
– Kan ikkje kombinera
I kommunedelplanen for fysisk aktivitet, idrett og friluftsliv (2016–2026) er grusbanen både markert som anlegg tilrettelagt for fotball, og som anlegg tilrettelagt for friidrett.
Friidrettsanlegget ved barne- og ungdomsskulen på Bryne er eit delanlegg, som er lagt til rette for hopp, kasteøvingar og korte sprintdistansar.
Ordføraren meiner at det er uproblematisk at friidretten kan søka om å få treningstid på området.
«Fakta er at banen i dag nesten står ubrukt store deler av året, mens fleire hundre barn og unge ikkje får trent grunna manglande banekapasitet på Bryne. Dette får vi nå løyst», skriv han til Tjosevik.
Ordføraren svarer at målet er at lengdegropa og kulegropa på Bryne skal behaldast. I tillegg er det klart at løpebanane skal behaldast. Når det gjeld kast, meiner han det må gå an å finna ei løysing der dette kan brukast på ein ny bane.
Men det går ikkje, svarer Per Rasmus Oftedal i friidrettsklubben.
– Nei, det går ikkje å kombinera det. Kanskje kan det gå med kulestøyt, fordi dei kastar maks 20–22 meter. Men med alle dei andre kastøvingane, så treng du eit anna banedekke. Det er det ikkje nokon tvil om.
Gav bort stadion
Fylkesordførar Ole Ueland sjekka med si eigedomsavdeling om det var noko i vegen for at kommunen kunne få overta grusbanen og legga kunstgrasbane. Oftedal seier at han nok må sjekka igjen – det skal i alle fall friidretten gjera.
– Eg har det ikkje svart på kvitt nå, men me skal gå inn i arkiva våre. Dette vart gjort på starten av 2000-talet, og det har vore mange leiarar sidan då. Me meiner me har ein avtale om delanlegget, og det har alle i kommunen og fylket sagt.
Han seier at fotballen «fekk veslefingeren – ja, nesten alle fingrane, og så tok dei heile handa», då Bryne FK fekk overta stadion.
9. september 2003 vedtok Time kommunestyre å selja stadion til Bryne FK for éi krone, slik at fotballklubben kunne tilfredsstilla anleggskrav frå Norges Fotballforbund. Samstundes vart bygginga av delanlegget ved skulane på Bryne vedtatt.
I etterkant vedtok friidrettsklubben, med meir enn 2/3 fleirtal over to ekstraordinære årsmøte, å seia frå seg bruksretten til stadion. Det nye delanlegget nedanfor Brynehallen var ein føresetnad både for kommunestyret og friidrettsklubben.
Oftedal seier at friidretten gav bort sin del i den «gode ånda» at klubbane støttar kvarandre i gode og vonde dagar. Fram til 1991 var idrettane ein del av same idrettslag.
– Ser berre seg sjølve
Rosseland Ballklubb er éin av dei som har kommentert på Facebook. Brynes andre fotballklubb skriv at kunstgras-nyheita er fantastisk, og at banen vil bli godt brukt, sidan banekapasitet er mangelvare.
Til det svarer éin lesar at det ikkje er noko nytt at fotballen øydelegg for friidretten på Bryne. Så langt vil ikkje Oftedal gå.
– Eg vil ikkje ta dei orda i bruk. Dei vil nok ikkje øydelegga for oss, men dei ser berre seg sjølve. Dei ser ikkje andre idrettar.
Styreleiaren skildrar ein klubb som, målt opp mot glansdagane, er sterkt redusert. Historisk har dei vore lokomotivet for friidretten på Jæren, nå mistar dei medlemmar til klubbar som Skjalg, Sandnes og Gjesdal, på grunn av dårlege baneforhold
– Det må det ikkje vera nokon tvil om at me er for samarbeid. Samstundes må me ta omsyn til kvar idrett sin eigenart, fordi me er forskjellige idrettar. Me er ein liten idrett, og treng for eksempel eit areal til kast.
Kommunens einaste idrettsplass, eit regionalt anlegg for friidrett med 400-meters løpebanar og naturgrasbane, ligg på Lye.
Det er eit godt anlegg for friidretten, seier Oftedal, men det er ikkje eit godt anlegg for Bryne friidrettsklubb.
– Medlemmane som me har i dag, ønsker å vera i nærmiljøet, det vil seia ved eit anlegg ein eller annan stad på Bryne, og det har me ikkje. Me har delanlegget, men det vil dei visst òg ta frå oss, ser det ut til.