Måndag morgon, mindre enn tolv timar etter Norges bragd mot Brasil, er det ikkje urimeleg å tenke at dei fleste som har moglegheita søv litt ekstra frampå.
Men for mange ungdommar på Jæren var det ikkje dagen for å slumre.
Klokka 10 skal det ha vore mellom 50 og 60 engasjerte på plass for å bidra med gratis arbeidskraft på Øksnevad videregående skole. Den neste veka skal dei, og nokon fleire, vere med og gjere området klart til festivalen som skjer frå 14. til 19. juli.
Dugnadsarbeidet starta så vidt fredag.
– Me brenn for dette. Det er givande å gjere noko utan lønn, å gjere noko for folket – for at me kan samlast og vere ein stor gjeng og ha det gildt, seier Regine Refsnes, leiar for Orre Bygdeungdomslag.
Kribla etter å kome i gang
Det årlege stemnet blir arrangert på ulike stader i landet, og skal no til Rogaland for første gong på 15 år. På programmet står konkurransar, konsertar, aktivitetar og sosialisering.
Deltakarane søv i telt og campingvogner på kjelvene bak skulen.
Tidlegare i år sa komiteen til Jærbladet at dei ventar seg mellom 2.000 og 3.000. Åtte dagar før festivalstart anslår Gunnar Tunheim, som har hovudansvar for leir og teknisk, at det har kome inn rundt 1.000 påmeldingar – utan at dette er ei kjelde til stress for han.
– Me manglar ein del, men dei kjem som regel siste veka. Jærbuane er dei som har kjøpt minst. Der har me så vidt bikka 100. Her er me spontane, så dei kjøper på dagen, tippar eg.
Veka før festivalen skal ungdommane setje opp 2.500 meter med byggegjerde, leggje grus, få kopla straum, klargjere eit hovudtelt på 2.000 kvadratmeter og organisere mat, aktivitetar, konsertar og langt meir.
– Me har berre kribla etter å kome i gang. Me veit ikkje heilt kva me går til, då me aldri har gjort det før, så det blir å prøve å gjere det beste ut av det, seier Tunheim.
Det er hovudsakleg frivillige ungdommar som står bak arrangementet, men undervegs vil også for eksempel Norges Bondelag og Norges Bygdekvinnelag vere delaktige, i tillegg til foreldre og andre som stiller opp.
– Du får igjen for det
Ronja Hadland er blant dei frammøtte måndag morgon. Ho skal køyre maskinar og setje opp byggegjerde rundt leiren.
– Det er gildt. Du får jo igjen for det, og folk snakkar om det i etterkant, seier ho.
Olav Goa, hovudansvarleg for straum, vedgår at det er tidkrevjande, men synest det er veldig kjekt å bidra til å lage eit såpass stort arrangement.
– Det er også eit ork og eit slit, men ein får ikkje gjort noko utan det, seier han.
