Ein mannleg bilførar i 50-åra blei i desember i Sør-Rogaland tingrett dømt til 45 dagars fengsel for aktlaus køyring og aktlaust drap etter ein kollisjon med ein syklist på Bryne sommaren 2024. Han blei også frådømt førarkortet i tre år frå dagen då ulukka skjedde, men han blei frikjend frå kravet om oppreisningserstatning.
Mannen aksepterte at han hadde brote hovudregelen i vegtrafikklova, som handlar om å vera varsam og ta seg i akt. Men han anka dommen for aktlaust drap – og subsidiært straffeutmålinga – inn for lagmannsretten.
No har Gulating lagmannsrett behandla saka, og fleirtalet der har kome til nett same konklusjonen som det Sør-Rogaland tingrett kom til: Mannen er skuldig i brot på paragraf 281 i straffelova «for uaktsomt å ha forvoldt en annens død».
Mannen blir dømt til nøyaktig den same straffa som det tingretten konkluderte med.
– Då tiltalte køyrde inn i rundkøyringa, var det ein trafikksituasjon som, ut frå vikeplikta, kravde særleg aktsemd. Fleirtalet finn det bevist at ulukka skuldast at tiltalte, over det som i denne situasjonen må vurderast å ha vore lengre tid enn heilt kortvarig, ikkje var så merksam og viste slik aktsemd som køyringa inn i rundkøyringa kravde, og at han difor ikkje såg avlidne koma syklande frå venstre inne i rundkøyringa. Han viste med det ei aktløyse ut over det alle bilførarar må vedgå at dei frå tid til anna gjer seg skuldige i, heiter det i grunngjevinga frå fleirtalet i lagmannsretten – begge dei to fagdommarane pluss tre av lekdommarane.
Lagmannsretten konkluderer samtidig med at aktløysa til tiltalte ikkje var grov, og at det dermed ikkje er grunnlag for å dømma mannen til å betala oppreisingserstatning.
Dei to siste lekdommarane utgjorde eit mindretal. Dei ville frikjenna tiltalte for aktlaust drap, og dermed også redusera straffa til 30 dagars fengsel.
Ulukka skjedde om kvelden søndag 30. juni 2024 i rundkøyringa mellom Reevegen og Arne Garborgs veg på Bryne.
Syklisten Bjarte Sandsmark (41) fekk omfattande skader då han blei påkøyrda av ein bil inne i rundkøyringa, og han døydde av skadane 18. juli same året.