– Dette betyr utruleg mykje, seier Jim Helge Lomeland til Jærbladet.
Han snakkar om Hognestad IL Boksing, som laurdag inviterte til opning av den nye boksehallen sin, bygd som ei forlenging av Hognestadhallen. Her er det boksering, 15 boksesekkar, hoppetau, medisinballar og anna utstyr. I same slengen har turnen fått ny utstyrslager.
Prosjektet har kosta rundt fem og ein halv millionar kroner. Av dei pengane har ein tredjedel komme frå tippemiddel, ein tredjedel frå kommunen, og ein tredjedel frå bygda, stort sett gjennom dugnad, sponsorar og gåver frå Jæren sparebank.
Klubbkjensle
Lomeland seier det vert greitt å få eit eige lokale til boksarane. Tidlegare har dei delt lokale med turnen, handballen og fotballen.
– Me har vore heldige som har hatt tilgang på hallen og fått leiga gratis. Men det vert lettare å bygga bokseklubben vidare når me har eit eige lokale. Utøvarane får kjend meir på klubbkjensla, seier Lomeland.
Dommen frå den unge boksaren Mikah Undheim er klar:
– Det er heilt fantastisk. Nå når me har fått ein eigen plass å boksa, vert det meir fleksibelt. I tillegg har me fått mykje nytt utstyr, seier Undheim.
Hognestad IL er det einaste idrettslaget i fylket som tilbyr boksing. Lomeland seier dei nå har 70 medlemmar.
– 20 av dei har kampbok. Det vil seia at dei reiser rundt på stemner og boksar. Me er med der det skjer, seier han.
Ordføraren frykta ein rett høgre
Opninga var ei høgtideleg affære, med talar blant anna frå idrettslagsleiar Tone Steinsland, landbruks- og matminister (og kvart hognestadbu) Geir Pollestad og ordførar Andreas Vollsund.
Sistnemnde var fullt klar over at han nok ikkje hadde gjort seg til venn med heile bygda då han og Høgre gjekk inn for å legga ned Hognestad skule.
– Det er sikkert ein del her som kunne tenkt seg at ordføraren fekk seg ein rett høgre av Ole Klemetsen etter opninga, medgav Vollsund.
Før nokon tok han på ordet, skunda ordføraren seg å legga til at det ikkje var derfor han var der.
– Det er gildt å vera med på å opna eit nytt idrettsanlegg. Hognestad idrettslag er framoverlente. Folk frå heile Jæren kjem til Hognestad for å vera med på turnen. Eg er sikker på at det same kjem til å skje med boksinga. De kjem til å ha kø ut døra, sa Vollsund, som spådde at den neste Ole Klemetsen vil komma nettopp frå Jæren.
Sakna sur stank
Grunnen til at det var så mykje snakk om Klemetsen, Noregs største boksar gjennom tidene, var at han var invitert for å kasta glans over opninga.
Klemetsen var imponert over det dei har fått til og dei nye lokala på Hognestad. Ein ting reagerte han likevel på med ein gong då han kom inn.
– Det luktar alt for godt her! Dei må få inn litt skikkeleg sveittelukt. Det skal vera surt. Jo verre, jo betre. Det er ikkje tull ein gong, seier Klemetsen til Jærbladet.
Han fortel at han har vore i bokselokal over heile verda og kjend på ulike vonde sveittelukter.
– Det er mykje forskjellig, seier han.
Klemetsen legg til at vond lukt frå motstandarane har gjort han til ein betre boksar.
– Det er nok derfor eg har vorte så god til å dansa rundt dei, seier han òg ler.
Første gong på Hognestad
Klemetsen gjorde meir enn å kasta glans. Han stilte og opp som dommar i dei to første demokampane i den fullstappa boksehallen. I tillegg fekk han med seg publikum på å klappa og heia.
Han gav òg frå seg ein av sine eigne pokalar til som bestemannspremie.
Laurdag var første gong 52 år gamle Klemetsen frå Stavanger vitja Hognestad.
– Eg har ikkje hatt grunn til det før. Men nå har eg det! seier Klemetsen til Jærbladet.
Klemetsen har ungar som boksar, og har allereie tilbydd seg å vera med på eit par treningar på Hognestad.
