Opna jærsk landsstemne med eit smell

Sletta ned mot Figgjoelva bak Øksnavad vidaregåande skule er frå og med tysdag kveld gjort om til ein gigantisk møteplass for unge folk frå heile landet.

Norges Bygdeungdomslag har lagt årets landsstemne hit, og ein stor, lokal dugnadsgjeng har lagt ned mange timar med arbeid for å gjera alt klart.

Tysdag kveld var det offisiell opning, med saging av planke, framføre ein feststemd gjeng – som seinare på kvelden skulle få konsertar, først med Silo & Saft, og så med Staysman.

Men kvifor akkurat desse artistane på opningskvelden?

– Staysman var aldri ein diskusjon. Han har spelt på landsstemnet dei siste 13 åra. Han er ein artist som alle vil sjå, som lagar fantastisk stemning kvar gong, slår infoansvarleg Nathalie Skurve fast overfor Jærbladet.

– Og sidan temaet for stemnet vårt her på Jæren er «Elleville vesten», hadde me også lyst å trekkja fram eit godt, lokalt band som er kjent for å skapa god stemning. Då var det naturleg å gå for Silo & Saft. Me spelar alltid musikken deira på festane våre, legg Skurve til.

Tysdag ettermiddag hadde landsstemnet på Øksnavad selt i overkant av 1000 billettar. Dei reknar ikkje med å klara å koma opp i 2000–3000 billettar, som dei får til når stemnet blir arrangert på Austlandet, men ser for seg at rundt 1200 skal vera i leiren gjennom veka, og at ytterlegare nokre hundre kjem innom på dei ulike delane av arrangementet som er opne for besøk.

Landsstemnet har eit innhaldsrikt program – med aktivitetar, tevlingar, konsertar og show – frå opninga tysdag til utsjekk søndag.

Det er 15 år sidan landsstemnet til Norges Bygdeungdomslag blei arrangert i Rogaland sist. Då var det på Nærland. I 2020 var det meininga at det skulle arrangerast på Øksnavad, men det året blei landet stengd ned på grunn av koronapandemien, og heile stemnet blei avlyst.