Truls Dishington heiter den nye Norden-sjefen i Green Mountain AS.
Han har nyleg overtatt som administrerande direktør etter Halvor Bjerke, som sjølv blei tilsett i mars i fjor. Bjerke overtok etter Svein Atle Hagaseth, som hadde vore toppsjef i drygt tre år.
Truls Dishington har lang fartstid i Green Mountain-systemet. Han starta som «project and service manager» i 2016, og sidan 2017 har han vore Chief Operating Officer, eller driftsdirektør, ifølge ei pressemelding som kunngjorde leiarskiftet 22. mai. Det betyr at han har vore del av leiargruppa i snart 10 år.
Intern rekruttering
«Som en ledende datasenteroperatør i Norge er vi glade for å kunne rekruttere internt når Dishington nå tiltrer rollen som Managing Director i Norden. Hans kunnskap om Green Mountain og bransjen vil være avgjørende når han fortsetter utviklingen av pågående og nye prosjekter i selskapet. Samtidig er vi takknemlige for Bjerkes engasjement og bidrag, og ønsker ham alt godt videre,» seier styreleiar i Green Mountain Global, Peter Ballon, i meldinga.
Den nå avgåtte Norden-sjefen representerte selskapet i eit godt besøkt folkemøte på Undheim samfunnshus i april. Oppi lia veks datasenteret deira fram, og selskapet held på med å tilsetta folk som skal jobba der. Til Jærbladet etterpå sa Bjerke dette om Undheim-prosjektet:
Kalberg: – Sit og ventar
– Dette er eit veldig viktig prosjekt for oss, og det er viktig å visa at me tar det på alvor. Det vil alltid vera kritiske røyster. Me trur at det er viktig og smart å vera opne, og me kjenner oss svært velkomne her. Eg håpar at bygget blir fint. Me er opptekne av å finna område som er regulert til det me driv med, og det er ikkje alltid like lett om det ligg nært der folk bur.
Han la til:
– Me ønsker å lytta til lokale stemmer og bygga datasenter der me trur det gir mest meining for alle. Viss noko ikkje er liv laga, vel me ein annan stad.
Om den mykje større og mindre avklarte Kalberg-utbygginga sa Bjerke dette:
– Kalberg er framleis under regulering. Me sit og ventar og ser kva det blir. Me kjem ikkje til å ønska å pusha noko som myndigheiter og lokalsamfunnet ikkje ønsker å ha. Me får sjå. Prosjektet er framleis interessant, sa Halvor Bjerke.
Stor usemje, mykje uklart
Fleire saker i Jærbladet i det siste har vist at Kalberg-utbyggar Time Energipark og Time kommune balar med store, uløyste utfordringar og til dels stor usemje.
Ikkje minst vil kommunen ha omkøyringsveg gjennom området for å avlasta trafikken gjennom Kvernaland/Orstad. Vegen har ein prislapp på over ein milliard kroner.
Mens Time Energipark vil ha eit spleiselag saman med Time, Klepp og fylkeskommunen, har Time-ordførar Andreas Vollsund (H) nyleg gjort det klart at utbyggaren må ta heile denne rekninga, elles blir det ikkje noko utbygging i det heile.
Han peikte på Green Mountain si milliardutbygging på Undheim. Kunden er eit ikkje namngitt «vestleg, internasjonalt selskap som er blant dei største i verda», ifølge den tidlegare Green Mountain-sjefen.
– Dei har nokre av verdas største tek-selskap som kundar. Det er så sterke kapitalkrefter i dette at dei må få det til, seier Vollsund.
– Avventar endeleg vedtak
Jærbladet bad fredag om eit intervju med den nye sjefen i selskapet. Men Truls Dishington har ikkje høve til å stilla til intervju nå, ifølge pressekontakt Mette Berger Gulbrandsen.
Green Mountain avventar utfallet av prosessen knytt til områdeplanen for Kalberg, skriv ho i ein e-post.
«Når det foreligger et endelig vedtak, kan vi evt. gjenoppta planene for datasenteret. Kalberg er fortsatt en attraktiv lokasjon for datasenteretablering, men inntil videre avventar vi den pågående prosessen», skriv ho.
– Held fram som planlagt
Halvor Bjerke har ifølge Green Mountain leia selskapet gjennom ein periode med strategisk utvikling. Han går nå vidare for å forfølga andre interesser utanfor selskapet, og Green Mountain takkar han for hans viktige bidrag, særleg i arbeidet med å vidareutvikla selskapets strategi og organisasjon, ifølge pressemeldinga.
Jærbladet har kontakta Bjerke for ein kommentar, men har ikkje høyrt tilbake.
«Jeg ser frem til å bygge videre på det sterke fundamentet som er lagt. Sammen med ledergruppen, de ansatte og partnere ser jeg frem til å lede selskapet gjennom neste fase av vekst og utvikling,» seier Truls Dishington i pressemeldinga.
Der understrekar Green Mountain også at leiarskiftet ikkje inneber endringar i strategisk retning, og at arbeidet med pågåande prosjekt held fram som planlagt.