Etter brannen gjekk Klepp i gang med ei midlertidig ordning for innhenting av plastemballasjen frå private hushaldningar, fram til nytt sorteringsanlegg stod klart.
Annankvar henting av restavfall blei erstatta med henting av plastemballasje, slik at både restavfall og plastemballasje blir henta kvar fjerde veke.
Plasten blir derfor samla i plastsekkar, som blir henta heime hos folk.
No ligg det an til at Klepp skal tilbake til den originale ordninga igjen, ifølgje saka som skal til politisk behandling i hovudutval for samfunn og kultur:
«Kommunedirektøren vil tilrå at me, i tråd til opprinneleg plan, frå og med 1. september 2026, går tilbake til ordning der plastemballasje blir kasta i restavfallet», heiter det.
Plast i rest i Klepp igjen
Med denne anbefalinga, vil kommunedirektør Torild Lende Fjermestad altså avslutte innhenting av sortert plastemballasje.
Plasten skal då kastast i restavfallet igjen, og restavfallet blir tømt kvar andre veke.
«Anlegget vil sørge for høg grad av utsortert plastemballasje og materialgjenvinning og vil føre til at alle IVAR sine kommunar vil oppfylle nasjonale lovkrav om utsortering av plast», skriv Fjermestad i saka.
Fjermestad legg til at statistikk viser til at det i snitt blei samla inn over 11 kilo plast per innbyggjar i Klepp i fjor, som skal vere meir enn nokon annan IVAR-kommune.
Ordninga skal altså ha ført til at kommunen har fått samla inn plastemballasje til kjeldesortering i staden for at det har gått til forbrenning.
Mindre endring i Time og Hå
Kva skjer med avfallet i dei to andre jærkommunane når det nye anlegget står klart?
I Hå blir det ikkje endringar når det gjeld verken avfallsdunkar eller tømmefrekvens, fortel Hermund Haugland, som er leiar for teknisk drift i Hå kommune.
– Hå kommune innførte ikkje midlertidig innsamling av plastavfall. Me har oppfordra til heller å hive plast på gjenvinningsstasjonen. Nokon har jo allereie hive plast i lag med restavfall, og det vil bli slik framover også, seier han.
Heller ikkje i Time vil det nye anlegget føre til særlege endringar for innbyggjarane, heller ikkje tømmefrekvens.
– Time valte løysinga med å hive plast i restavfall eller å levere til utplasserte containerar. Elles har det gått i restavfallet. Me hadde ikkje eigen dunk til plast som me sende ut til folk, sidan det var i ein avgrensa periode, og gebyret då ville falle på innbyggjarane, seier Ole Bjørn Maråk, leiar for kommunalteknikk i Time.
– Me såg at me fekk levert inn mykje mindre plast i desse containerane, noko som er beklageleg. Dessverre har mykje då gått til brenning i den perioden, seier han.
IVAR har anslått at anlegget skal vere i full drift sommaren 2027, ifølgje NRK.
– Containerane kjem til å stå fram til plasten skal hivast i restavfallet igjen, når sorteringsanlegget er fullt oppe og går.