Tenesteområdet for Helse og velferd i Hå kommune ser ut til å bruka meir pengar enn det politikarane sette av då dei i fjor haust laga budsjett for 2026. Det går fram av tertialrapporten, som skal opp i kommunestyret 1. oktober.

I rapporten går kommunedirektøren inn for å justera driftsbudsjettet til tenesteområdet opp med 4,87 millionar kroner.

Pengane skal gå til å dekka utgifter til legevikar ved sjukefråvær og permisjonar i samband med svangerskap eller utdanning.

Stussa ved høgt tal

Då Utval for helse og velferd i førre veke diskuterte tertialrapporten, stussa Stein Aarsland (KrF) på dette punktet.

– Det er eit enormt høgt tal, sa Aarsland om dei nær 4,9 millionar kronene.

Kommunalsjef Jørn Kosmo stadfesta at legetenestene har hatt eit meirforbruk.

Ei sentral forklaring har å gjera med det som blir kalla «overlegepermisjon». Avtalar mellom Legeforeningen og KS/Spekter, sikrar nemleg alle overlegar og legespesialistar rett til fire månadar med utdanningspermisjon kvart femte år.

I Hå er det til saman 21 slike legar. Det tilsvarar fire årlege utdanningspermisjonar.

Ordninga fører til auka utgifter for kommunen. Kommunedirektøren ventar å bruka 5,87 millionar kroner på dette i år. Éin million kroner kan hentast frå den ordinære ramma til Helse og velferd. Resten foreslår ho å henta inn gjennom ei justering av driftsbudsjettet.

Må nytta vikarbyrå

Det er dette talet Aarsland stussa på. Forklaringa han fekk frå kommunalsjef Jørn Kosmo, var at det har vist seg vanskeleg å rekruttera legar inn i fire månadars vikariat.

– Då må me bruka vikarbyrå. Det er dyrt, sa han.

Vikarutgiftene kjem på toppen av at dei må betala lønna til legane som er ute i permisjon.

– Dei har med seg både lønn og insentivlønn. Det blir ein trippeleffekt som me ikkje har tatt høgd for, sa Kosmo.

– God kontroll

Generelt er det likevel god kontroll og økonomistyring i alle tenesteområda, skal ein tru kommunedirektøren sin tertialrapport.

Prognosen nå er at kommunen styrer mot eit netto driftsresultat på 36,5 millionar kroner. Det svarar til 1,7 prosent av driftsinntektene.

Det er eit stykke over 22,3 millionar og 1 prosent av driftsinntektene, som var det det opphavlege budsjettet la opp til.

På den andre sida er det framleis eit lite hakk under dei 1,75 prosentane som blir rekna som eit minimum om ein kommune skal ha berekraftig drift over tid.