Medan Time kommune har fylkets raskaste behandlingstid av byggesaker, heng dei etter i Hå. I fjor brukte byggesaksavdelinga i Time i snitt 9 dagar på å svara på byggesaker med 12 vekers behandlingsfrist. I Hå var det tilsvarande talet 31 dagar. Det er over tre gongar så lang tid.
Med ujamne mellomrom har utolmodige lokalpolitikarar i Hå tatt dette opp med administrasjonen. Forklaringa dei har fått, har i stor grad handla om sjukmeldingar og for liten kapasitet kopla med store saksmengder, men òg feilrapportering av data.
Betring
Det siste året har det vore ei viss betring i saksbehandlingstidene. Kommunen har utvida staben – fleire personar er òg på veg inn –, dei har omstrukturert organisasjonen og for å få ned etterslepet av gamle saker har dei leigd inn hjelp frå naboane i Time.
– Me har god tru på at dette er riktige grep, og ventar at det vil gje effekt, sa Magnus Ånestad (KrF), då han på slutten av kommunestyret la fram ein interpellasjon på vegner av KrF, Høgre, Framstegspartiet, Senterpartiet og Arbeidarpartiet.
Partia har nemleg såpass tru på grepa som nå er gjort, at dei vil legga ambisjonsnivået høgare.
– Når kapasiteten nå er betre, bør me strekka oss etter raskare og meir effektiv saksbehandling. Dette er viktig, både for innbyggarane og for næringslivet. For utbyggarar er føreseielegheit og korte behandlingstider ofte avgjerande for kor dei vel å bygga, sa Ånestad, som òg er leiar i Utval for samfunn.
På vegner av dei fem partia som styrer i kommunen, bad han ordføraren sørga for at politikarane får ei sak på bordet som skal greia ut:
- Konkrete mål for raskare saksbehandlingstid
- Korleis ein kan fasa inn desse måla
- Kva tiltak som trengst for å nå dei
- Korleis ein skal følga opp korleis arbeidet går
Vil ha høgare ambisjonar
Ordførar Andreas Bjorland (KrF) takka for eit viktig og aktuelt spørsmål.
– Det er ikkje tvil om at me over tid har hatt for mange saker som ikkje har blitt behandla innan fristen, sa han.
Ordføraren nytta samtidig høvet til å rosa dei som jobbar med byggesaker i kommunen.
– Me har mange svært dyktige fagfolk i kommunen som kvar dag gjer ein grundig og samvitsfull jobb, ofte under stort arbeidspress, sa han.
Bjorland sa òg at Hå i dag ligg omtrent «midt på treet» når det kjem til tidsbruk på byggesaker. Kommunen bruker mindre tid enn landsgjennomsnittet, men meir enn Klepp og Time.
Ordføraren viste òg til at det allereie er gjort.
– Men når det er sagt, er ikkje dagens situasjon god nok. Eg meiner, i likskap med interpellanten, at Hå kommune bør ha høgare ambisjonar enn å berre ligga tett opp mot maksimumsfristane i regelverket, sa Bjorland, som meinte at rask og føreseieleg saksbehandling «er avgjerande» både for innbyggarar og næringsutvikling i kommunen.
Konservativt ville kjappare i gang
Bjorland lova politikarane at det, basert på interpellasjonen, vil komma ei sak der Utval for samfunn får høve til å vera med og bestemma kva mål kommunen skal ha for byggesaksbehandlinga.
Dette fekk tilslutnad både frå Gunn Hege Skretting Sirevåg (H) og Svein Arve Nygård (Frp) som begge har tatt temaet opp tidlegare.
Den einaste malurta i begeret kom frå Arne Husveg (Konservativt), som ville legga politikarane sitt ambisjonsnivå litt høgare. Husveg var redd saka dei fem partia bad om, vil vera for generell når ho kjem tilbake til politikarane.
Han tok derfor til orde for å be om ei sak som skal innehalda konkrete tiltak, vurdering av ressursbehovet, forslag til tidsplan for gjennomføring og eit opplegg for rapportering tilbake til kommunestyret.
Responsen han fekk frå Høgre og Kristeleg Folkeparti, var at dette i stor grad var likelydande med saka Ånestad hadde etterlyst.
– Forskjellen er at då sender med eit signal om at saka startar nå, ikkje at ho skal starta seinare, svarte Husveg, som likevel ikkje lukkast med å få andre til å stemma for det alternative forslaget sitt.
Ordførar Bjorland meinte det var tale om prinsipp.
– Skal me gjera store endringar i kommunen, begynner me ofte med saksframlegg, sa han.
Argumentet for å be kommunedirektøren om å legga fram ei sak før ein tar avgjerder, sa han, er at det ofte er faglege spørsmål som må belysast, og dette må gjerast av fagfolk. På den måten får politikarane, som ikkje er fagfolk – og heller ikkje skal vera det – grunnlag for å ta gode avgjerder. Då vil dei òg vita om det er behov for å gjera budsjettjusteringar.
– Eg trur me oppnår det beste resultatet om me har det faglege grunnlaget før me legg for sterke føringar, sa Bjorland.