For rett over ti år sidan blei det ein bråstopp i salet av tomter i Stokkalandsmarka, det som skulle vera Hå kommune sitt store satsingsområde for bustadbygging.
I tida som har gått sidan har Jærbladet med ujamne mellomrom komme med oppdateringar om manglande tomtesal – kinkig, gjeve at kommunen hadde kjøpt om mange hundre mål og investert store summar i å legga til rette infrastruktur.
Vellukka taktikk
Dei siste par åra, har lyden gradvis blitt ein annan. Då Jærbladet intervjua dåverande næringssjef Mons Skrettingland under overskrifta «Har seld to tomter på to år», gav han uttrykk for optimisme.
To ting låg til grunn for det: Endringar i marknaden og ei ny tilnærming med å gje bustadvutviklarar tilgang på tomter som dei kunne bygga hus på, utan at dei måtte betala tomtene før huset var seld.
Taktikken har vist seg å fungera.
Det stadfesta den nye næringssjefen Sven Harbo under ei orientering til formannskapet i juni.
– Effekten Mons hadde sett føre seg, at salet ville komma når folk såg at det skjedde noko i Stokkalandsmarka, har absolutt slått til, sa Harbo.
Han ramsa opp firma og namn på enkeltpersonar som har bygd, er i ferd med eller skal bygga i Stokkalandsmarka. På eit kart blinka han ut tomt etter tomt der noko nå er i ferd med å skje.
Harbo varsla òg at kommunen vil stramma til litt på opsjonsavtalane.
Blant anna må eit firma betala inn femti tusen kroner per tomt allereie ved signeringa av avtalen.
– Så pass tru må dei ha på at dei får selt huset etterpå, sa Harbo.
Eit anna viktig punkt er at ingen får ha opsjon på meir enn ei tomt. Unntaket er om dei allereie har ei tomt under utvikling. Då kan dei ha ei ytterlegare tomt liggande på vent.
Rekkehus
Foranledningen for orienteringa, var at Norgeshus, som er sterkt til stades i Stokkalandsmarka gjennom firmaet Norgeshus JR Bygg Eiendom, ville gå inn på ein avtale om ei tomt som skal brukast til å bygga rekkehus.
Avtalen, som eit samrøystes formannskap sa ja til, er som følger: Norgeshus betaler 100.000 kroner for førsteretten til å kjøpa ei 2,8 dekar stor tomt. Her vil dei bygga til saman tolv rekkehus, fordelt på fire byggetrinn, eller rekker.
Den totale prisen for tomta, som må betalast etter kvart som kvart byggetrinn blir starta, er 5,75 millionar kroner.
Opsjonsavtalen gjeld i tre år.
– Det er òg interesse for å kjøpa ei anna stort tomt i området og bygga seks leilegheiter der, sa Harbo.
Kan gå tomme for byggeklare tomter
Konklusjonen hans var at det er «god gang overalt i Stokkalandsmarka».
– Det som då skjer, er at me plutseleg må tenka på kva me skal gjera i neste trinn, sa Harbo og henta opp eit kart som viste det aktuelle området – også det allereie i kommunen sitt eige.
Den nødvendige reguleringa er allereie gjort, men infrastrukturen er ikkje opparbeida.
– Me har så vidt begynt å sjå på det, sa Harbo.
Næringssjefen fortalde at han «på jabnå» får telefonar frå interesserte bustadutviklarar.
– Med den takta som er nå, vil det vera tomt til slutten av neste år. Me må til med fleire vegar og nye område, sa han.
På eit punkt blei næringssjefen så pass ivrig at kommunedirektøren måtte minna han på at det er opp til administrasjonen å føreslå, men politikarane som bestemmer. Men med den formaninga på plass, kunne Harbo informera om at politikarane snart ville få eit forslag til korleis Stokkalandsmarka skal utviklast vidare.
– Me har begynt å tenka framover, sa Harbo.
Forslaget som kjem, vil legga opp til rundt 30 nye einebustadtomter pluss område til meir konsentrert bustadbygging.
– Endeleg
Njål Sikveland (Ap) sa at dette hadde dei venta på lenge.
– Endeleg er det andre enn oss som ser det potensialet som faktisk er i Stokkalandsmarka, sa han.
Ordførar Andreas Bjorland (KrF) viste til at etterspurnaden etter brukte bustadar i Stokkalandsmarka er stor. På det grunnlaget slo han fast at det er eit attraktivt område. Samtidig, meinte Bjorland, har nok politikarane i tidlegare tider hatt for stor tru på at enkeltpersonar sjølv skulle utvikla tomtene, slik det var før.
– Men det har blitt for komplisert, både med tanke på bankavtalar og kva som faktisk er lov å gjera sjølv, sa han.