Sparebankstiftelsen Jæren – Klepp har gjeve tilsegn om ein halv million kroner i støtte til kjøpet av Åse-Marie Nesse si diktarstove i havgapet på Sele.
– Me er veldig glade for det. Dette er akkurat det som trengst for å få sluttfinansiert kjøpet, seier Ingrid Lea Mæland i den ferske venneforeininga, som har teke initiativet til at Klepp kommune skal kjøpa diktarhytta.
Ho fortel at Åse-Marie Nesses venneforeining med denne nyheita er optimistiske før kommunestyret skal fatta endeleg vedtak om kjøp av diktarhytta på Sele. Det skjer i møtet 15. juni.
Nyleg sa politikarane i formannskapet nei, med knappast mogeleg fleirtal – fem mot fire. Men i formannskapet gjekk det også fram at fleire partigrupper er delte i synet på om kommunen skal kjøpa, så det ligg an til ein spennande debatt i kommunestyret.
Kommunedirektør Torild Lende Fjermestad sende saka til politikarane med innstilling om at Klepp kommune skal kjøpa hytta for 6,5 millionar kroner, og at dette mellom anna skal finansierast med sal av Lalandshuset.
Det gamle jærhuset på Laland har Klepp kommune fått taksert til rundt 6 millionar kroner. Kjøpet skal etter planen mellomfinansierast ved at Klepp kommune tek pengane midlertidig frå disposisjonsfond.
Det ligg inne i den politiske saka at venneforeininga skal ha ei aktiv rolle, både når det gjeld å søkja om pengestøtte frå private og i drifta av eigedommen.
Tanken er at hytta skal vera eit senter for levande kulturformidling, der nye generasjonar får læra om Åse-Marie Nesse si dikting, og om samfunnsengasjementet hennar knytt opp mot menneskerettar og ytringsfridom.
Venneforeininga hadde for øvrig formelt stiftingsmøte fredag ettermiddag.
Sparebankstiftelsen Jæren – Klepp er den eine av to stiftingar som er store eigarar i Jæren Sparebank, og som har som eit viktig føremål å gje tilbake av overskotet frå banken til gode tiltak i lokalsamfunnet.