– Me har flytta heile butikken på tre dagar. Det har vore harde bod, og lite søvn, seier «The Grillfather» Roy Søyland.
Det har gått slag i slag sidan Lavinia AS, selskapet som dreiv Il Tempo, blei slått konkurs 17. april.
Ti minutt før opning legg Søyland dei siste kjøtstykka klare i disken. Sambuar Lene Christine Langeland har funne fram støvsugaren og har ikkje fått på seg uniforma enno.
– Det har vore litt armar og bein, seier Langeland.
– Men me har fått 98 prosent på plass, så det er me fornøgde med, seier Søyland.
Uteservering ved parkeringsplassen
Grillentusiasten opnar i dag butikken, som er flytta frå Njærheim.
– Det er heilt nytt for oss å kome inn på eit kjøpesenter. Me har hatt mykje gode kundar på Nærbø, og satsar på enda betre sal når me kjem her til Bryne, seier han.
Søyland har også planar om ein amerikansk diner i lokala ved sida av butikken, som skal stå klar om nokre veker. I forbindelse til den, vil han ha ei uteservering ved parkeringsplassen.
– Her skal me ha bord og stolar, og så skal grillen stå der borte ved inngangen til kjøkkenet, fortel han, og viser til eit område inntil fasaden med hendene sine.
Han håpar på 50 til 60 sitjeplassar utandørs.
– 80–90 prosent av maten som skal serverast i restauranten blir laga på store «smokers» frå Texas, også på vinteren.
Søyland trur det vil ta eit par månader før han kan tilby servering ute, men håpar den 70-tals inspirerte dineren inne kan opne så fort som mogleg.
Først må han få svar på søknaden om skjenke- og serveringsløyve frå Time kommune.
– Dei begynner å måle neste veke. Målet er i slutten av mai, til Jærdagen, men det er ikkje sikkert det går. Me satsar på at kommunen er kjappe på labben.
– Fascinert over folk som får til sånn som dette
Det er ingen straum av kundar når gitteret opnar for første gong. Men «The Grillfather» fortel at han ser fram til fredag.
– Korleis trur du dagen i dag blir?
– Eg veit ikkje, me får nesten berre sjå, men eg trur dagen i morgon blir veldig bra. Då kjem importøren av grillane me sel, og grillar mat på stand ute på plassen.
Ein av kundane Jærbladet treffer i den ferske butikken torsdag, er Emil Steira. Han er frå Sandnes, men har budd på Nærbø tidlegare, og vore innom butikken då den låg der.
No har han budd på Dagali utanfor Geilo i over 30 år, og dreiv før med eit lite utsal der. Han skildrar seg sjølv som spesielt interessert.
– Eg måtte jo innom og kikke når dei opna her. Eg er veldig fascinert over folk som får til sånn som dette, og det veldig bra at folk bruker det, seier han.
Også Ingvar Gilje frå Lye var innom for å kikke. Han har ikkje vore på butikken på Nærbø før.
– Det er alltid litt spennande med nye konsept, seier han.