Tanken er at bygget som vender ut mot Stasjonsvegen kan brukast om igjen og byggast på med opp til tre ytterlegare etasjar.
Mellom 8 og 18 leilegheiter
Sjølve kraftfôrlageret, som ligg i bakkant, blir i dag nytta til lager og parkering. Dette kan, ifølge planforslaget, gjerast om til bustadar.
Totalt opnar planen, som nå er ute på høyring, opp for ein plass mellom 8 og 18 leilegheiter. Uteopphaldsplassar kan komma på toppen av kraftforlageret, i tillegg til flata som ligg ved sida av lageret, ut mot Rådhusgata.
For å få det til, opnar kommunedirektøren opp for å gjera unntak frå kommunedelplanen for Varhaug sentrum sine solkrav for balkong og fasadar. Kommunedirektøren meiner det er viktigare at desse bygga blir tatt i bruk, noko som kan føra til fleire trivelege fasadar i sentrum.
For å sikra meir solinnstråling, set kommunedirektøren krav om 15 meters avstand mellom dei to punkthusa i bufellesskapet for seniorar, som skal byggast på sørsida av det gamle kraftfôrlageret.
Pizza i første etasje
Planen legg opp til næring, tenesteyting, forretning og bevertning i første etasje ut mot Stasjonsvegen.
I dag held restauranten Varhaug Stasjons Pizza & Grill til her. Restauranten flytta dit for fem år sidan, i samband med at det gamle kjøpesenteret Sentrumsgården, der dei tidlegare heldt hus, blei rive.
Ingen umiddelbare planar
Det er søskenbarna Andreas Horst Haugseng og Rassin Haugseng som eig bygget som ligg ut mot Stasjonsvegen. Horst Haugseng er òg dagleg leiar i Varhaug Parkering AS, som eig det gamle kraftfôrlageret.
Han seier til Jærbladet at det førebels ikkje er aktuelt å realisera planane.
– Ikkje på kort sikt, i alle fall, seier han.
Bygget som ligg ut mot Stasjonsvegen blei regulert til bustadblokk for fem år sidan, då sentrumsplanen for Varhaug blei vedtatt. For Haugseng var det viktig å sørga for at denne reguleringa ikkje blei endra.
– Me vil ha moglegheitene opne, seier han.
Fristen for å komma med innspel til detaljreguleringsplanen er 21. juni.