Gjekk konkurs i april – nå blir den dyre maskinparken lagt ut for sal

Den 24. april i år blei Haugstad Fabrikker i Skulegata på Vigrestad slått konkurs av Sør-Rogaland tingrett. Fabrikken hadde då 45 millionar kroner i gjeld.

I ei pressemelding uttalte dåverande eigar Brian Skjefrås at det hadde lenge blitt jobba med å kutta kostnadar og finna investorar som kunne bidra til vidare drift, men at dette ikkje hadde ført fram.

Brukte 100 millionar på nye maskinar

Haugstad Fabrikker var ei vidareføring av Haugstad Møbel, ei av hjørnesteinsbedriftene på Vigrestad, grunnlagt i 1946.

I 2024 gjekk Haugstad Møbel konkurs med ei gjeld på 121,8 millionar. Det skjedde etter ei omfattande investering og omlegging av produksjonen som fabrikken aldri klarte å tena inn igjen.

Målet med investeringa var å seksdobla produksjonen gjennom omfattande automatisering og ei heilt ny produksjonslinje. Fabrikken skal ha brukt så mykje som 100 millionar kroner på omlegginga.

Nå går maskinparken under hammaren gjennom det europeiske auksjonshuset Troostwijk Auctions.

Utstyret skal ha kapasitet til å produsera mellom tre og fire tusen kjøkken i året.

– Eit moderne produksjonsmiljø

I ei pressemelding omtalar auksjonshuset maskinparken som «forholdsvis ny».

Martijn van Schie, som er kundeansvarleg for industrisektoren i Troostwijk Auctions, seier i pressemeldinga at ein konkurs ikkje automatisk betyr at maskinane har mista verdien sin.

– Her snakkar me om eit moderne produksjonsmiljø der det de siste åra er investert monaleg i automasjon. Når maskinane nå kjem tilbake på marknaden, kan andre produsentar bygga vidare på investeringane som allereie er gjort. Det er økonomisk fornuftig, seier van Schie.

I alt blir 33 ulike objekt frå Haugstad nå lagt ut for auksjon på den internasjonale marknaden. Dei fleste av desse er maskinar meint for å tilverka tre.

Fristen for å legga inn bod er 17. september.